林雅詩早前宣布退出三級片行列，並於明年與圈外男友結婚，但近日市面上卻出現一隻印有林雅詩演出之三級VCD《應召女郎2003》，不過她卻揚言冇份演出，懷疑有人渾水摸魚。
林雅詩（Grace）自今年八月約滿寰宇電影後，早前她接受本報專訪時，曾宣布退出三級行列，並在明年初與圈外男友阿Man拉埋天窗，但近日她得悉市面上出現一隻三級VCD《應召女郎2003》，其名字及相片均印在封面上，然而她卻表示從未有參與該片拍攝，故懷疑有人渾水摸魚，現時她正考慮向該片監製羅舜泉採取法律行動。
目前《應》片VCD已在市面推出，該碟封面印有由林雅詩、鍾淑慧、關寶慧及顏仟汶主演之字樣及照片，題材方面則講述應召女郎為要在一年內賺取二十萬，而跟二百個男人上床的故事。
日前本報聯絡Grace，她透過電話說：「之前羅舜泉係有搵過我拍呢套VCD，但我冇接到，所以我都唔明點解會有我個名同相出現，封套出現嘅相，係之前我同李修賢拍嘅另一套VCD《錯愛馬伕》影落嘅，佢哋用呢張相都已經唔啱啦，重話我有份做，唔好當人乜都唔知至得㗎。」
Grace揚言曾致電羅舜泉問及此事，她說：「佢話冇理由喎，因為套片喺香港冇得賣，但𠵱家周圍都有得賣，跟住佢又話要研究吓先，我就諗住出律師信㗎啦，要佢賠償囉，叫佢收番啲片就冇可能，但我都要同律師商量吓點處理件事。」
此外，Grace原先定下婚期為明年一月七日，但日前她表示因最近置業，新居正值裝修，故待新居入伙後才可舉行婚禮，故其婚禮將延遲一個月，要踏入猴年後才結婚。
採訪：朱倬誼
攝影：陳志嵐
