簡潔平衡係MondernLiving概念嘅一個要點，正如全新日產Cefiro第一開發部外形設計師阿部俊之指出，新車外觀崇尚Dynamism與Comfort並重，以平衡為先之餘，並取兩者之長，因而成為新款Cefiro和諧優美嘅外觀。
全新Cefiro糅合咗日本房車設計主攻嘅動感，同埋歐洲車主張嘅穩重，外形獨特之餘，更集歐洲及日本主流優點於一身，可謂既悅目又銳利；阿部俊之借用日本刀與弓嘅美學特徵，車身平面有如刀削成形，營造爽快利落嘅動態感覺；車頂弧形線條則模仿彎弓形態，勾劃優美嘅曲線。當外形有定稿後，設計小組繼續修改拱頂嘅形狀，特別將車頂嘅最高點推前，此舉有兩大優點：外觀上為Cefiro造就一個淚滴形及前後不對稱嘅輪廓，功能上將車頂嘅壓迫感減低，擴大駕駛者嘅視野，從而達致前所未有嘅開揚感覺。另外，阿部俊之等設計人員，更棄用傳統日本房車嘅低尾廂設計概念，並以低調嘅筆法勾劃出高身車尾廂，從而令車子能有別傳統日本設計外，亦極具歐洲車嘅氣派。