林百欣林明珠父女前晚及昨日分別現身上海，卻無緣相見。風騷的林明珠與外籍男伴欣賞時裝騷，而林伯則出席其投資近九億元的五月花生活廣場奠基禮。林明珠表示很久沒見家人，直言不在乎與家人的關係。
麗新集團主席林百欣與女兒林明珠因錢銀轇轕關係破裂，前晚及昨日兩人同在上海，但卻無緣見面。
林明珠前晚衣着性感偕外籍男伴欣賞VivienneTam時裝騷，林伯昨日則在養子林建康陪同下，出席其投資近九億元的上海五月花生活廣場奠基典禮。
欣賞VivienneTam新裝騷的嘉賓除了林明珠外，還包括台灣歌手許茹芸等。問林明珠外籍男伴是否其男友，她表示對方只是朋友，並說：「後面重有一大班呀。」
林明珠又表示現主力籌備其畫廊舉辦的大型展覽，她說：「明年六月喺法國舉行，有好多籌備工作要做，所以我下個星期一就會飛去法國㗎啦。」
林明珠續說：「喺法國嘅展覽會上，將會展出近二百五十件藝術品，適逢明年係法國嘅『中國年』，所以我覺得呢個時機搞展覽係最好嘅timing。」
問林明珠為展覽活動頻撲，是否很久沒有見家人？她說：「係呀，不過我都唔在乎，靠通電話咪得囉。」而其父林百欣昨日出席奠基典禮時表示，地皮佔地十四萬平方米，七年前已買下，記者告之他女兒林明珠也在上海，林伯表示並不知情，他說：「我都想搵佢呀。」問林伯他們父女因芝大廈的錢銀轇轕，致關係破裂，女兒是否還清欠他的款項？林伯說：「梗係未啦。」
此外，前晚有份演出VivienneTam新裝騷的名模陳嘉容表示，前日在後台被一名穿上高跟鞋的模特兒不小心踩了一腳，她說：「佢啱啱踩中我腳趾尾，腳指甲即時爆開，肉都甩咗一細塊出嚟呀！當時我痛到想喊，但係又冇時間去睇醫生，出台時都係搵兩塊膠布貼住先，但係啲血重係咁滲出嚟。」
記者DebbieLum、ChenWaiOn上海直擊
