余文樂的新片《尋找周杰倫》即將上映，今次他不是扮演型格靚仔，而是做一個不修邊幅的古怪老闆，在片中他要與烏龜做對手戲，望着牠訴心事。
於下月十三日上映的新戲《尋找周杰倫》，男主角是余文樂，女主角則是新人浦蒲，而吳彥祖、吳大維及阿牛都有份演出。
余文樂平時十分貪靚，每次出席公開場合，都會刻意打扮一番，再加上他出道以來，都是接拍一些有型有格的靚仔角色，但在《尋》片中，他要不修邊幅，令他頗難接受，阿樂說：「當日試造型，我都俾自己嚇咗一跳，我都覺得自己幾難睇，幾核突。」
《尋》片講述阿樂是一個二手CD舖老闆，平時古古怪怪，還會因小動物的死而傷心幾天，演這樣一個多愁善感的人，對阿樂來說會否難以掌握？他說：「有啊！尤其拍呢套戲嗰時，我拍緊《無間道II》，又要拍劇同宣傳新碟，重要成日多愁善感，同平時開心嘅我唔同，都幾有挑戰性。
「我重記得有一場考我耐性，係要同隻龜做戲，我就係咁睇住隻龜行同埋同佢講嘢，點知佢行我就忍唔住笑，一拍就幾個鐘。」
該片以周杰倫命名，故事講述女角浦蒲千方百計找尋周杰倫的一張特別版唱片，所以導演林愛華極力游說周杰倫出鏡。
林愛華說：「我同周杰倫講咗好耐，因為佢冇拍過電影，又有好多人想搵佢拍戲，好在我畀劇本佢睇，佢都覺得幾得意，最後終於肯應承出鏡。」
採訪：楊潔雯
