連續兩日都有大計公布嘅國中控股（202），前日股價勁升後，噚日升勢放緩，收報0.63元，升1.6%。據聞隻股主要捧場客未必係本地散戶，而係大陸同胞。
國中喺周三公布，以1.79億元人民幣，收購在上海上市的上海強生控股12.87%,，噚日又公布在咸陽市投資水廠，總投資額2億元人民幣。
經紀陳話，兩個項目都係現兜兜畀現金，或者因為咁，所以有融資界人士獻計，不如在股票市場度水。
噚日中航科工（2357）首日掛牌一鳴驚人，今日輪到服裝股寶姿（589）掛牌。經紀陳話，如無意外，隻股一定有得炒，但稍後可能會有回吐，消化散戶的獲利貨，所以抽唔到寶姿唔使失望，過兩日等佢回吐時，再考慮買唔買都未遲，早排同一保薦人嘅理文造紙（2314）走勢非常值得參考。
更正：昨日本欄提及的華瀚生物科技，正確應為華瀚生物製藥。
慕容小初