早陣子，安排咗一眾香港汽車傳媒，前赴日本實地測試全新Mazda3（即舊有323）家庭車嘅本地代理商，正積極部署新車到港嘅事宜，由於新車款富活力又見朝氣，加上一班試過車嘅傳媒，對其操控及底盤配搭皆有唔錯評價。雖然未正式推出，但呢部Mazda3早已為城中熱門話題。日後對代理宣傳新車都可謂事半功倍㗎！然而，有先天嘅聲勢，都要有後天實質嘅支持呢！最近，亞Mark就聞得萬事得代理，有意將窩打老道多年嘅陳列室喬遷咁話，可能有關方面覺得該區並非車迷熱門睇車嘅地方都唔定，順道搬新舖或許會為快將抵港嘅Mazda3造勢呢！至於話選址方面，經過亞Mark多方查探下，原來就係九龍汽車一條街集中地嘅尖沙嘴柯士甸道，而位置就喺正現有富士陳列室斜對面，以及三菱Showroom左鄰，既靠近彌敦道之餘又離佐敦地鐵站只不過三數分鐘路程，可見代理部署得周密又有遠見㗎！