太空人今日訪港，城中其他活動都要讓路，好似有線嘅十周年慶祝晚會，就受到影響。八方噚日同有線主席吳天海傾起，佢哋今晚搞咗個酒會同千人宴，本來節目定咗六點半，預咗董特首做貴賓，但點知撞正太空人訪港，惟有將酒會提早到五點九舉行。
有線經已十歲，佢哋話有線新聞已經連續播咗八萬八千小時，每日播映嘅節目時間更達一千五百小時。吳主席話，佢哋做一日，等如其他免費電視台做二十日。八方諗起佢哋當初喺伊利莎伯大廈爬天台水箱示範微波傳送，到今日用數碼，成功真係唔易。
吳天海重話做咗十年，成績叫做僅僅及格，所以唔係好明人哋點解咁踴躍做埋一份。今晚重會頒發十年服務金牌，二千八百名員工內，逾三百個夠資格攞，包括吳天海、新聞總監趙應春、財務總監黃森輝同收費電視副總裁盧峻等。
傳真︰2623-9278
電郵︰