最近銀行股股價持續上升，升到你唔信，唔少賓架都忍唔到笑，一講起就四萬咁口。退休賓架揸住好多恒生，每年收息收到笑，呢輪更加笑，左丁山問佢使唔使請鄭海泉食番餐勁嘅，以示多謝呢位夥計管理銀行管得好。以為開玩笑啫，點知退休賓架當認真，立即唔笑，對左丁山講：「嗱，我退休時，佢重係做緊經濟研究，唔識佢，如果你有辦法請到佢出嚟食飯，我任你食乜都得，呢位鄭生令股東得益唔少呀！」
佢咁認真，左丁山唔敢再講笑，把口噏吓啫，你估咁易請到鄭生食飯咩。賓架C冇恒生股票，但佢有唔少自己銀行嘅option（認股證），再升落去，佢大可套現，提早退休，左丁山於是恭喜佢，點知佢話：「其實如果自己學足施德倫咁好嘢，今日已經可以退休啦。」施德倫就係滙豐銀行艾爾敦嘅前任，佢退休之後，在香港定居。據賓架C講，施德倫在滙豐服務期間，每個月出糧，一定留番一筆錢買滙豐股票，持之以恒長揸不放，到退休之時，算一算條數，以銀碼計，可能重勁過份退休金。
啲蘇格蘭人識慳識計數，由佢哋管理滙豐，啲股東可以放心，冇人會做滙豐大花筒。據退休賓架講，以前施德倫請客，回家吃飯，餸菜就係家常過平常，與芽菜炒青菜差唔多，非常健康，蘇格蘭人持家之道，用諸於滙豐，股東有乜辦法唔笑。