淡友果然趁抽水狂潮反攻。噚日早市初段，淡友一度質穿港股12000關口，不過下午好友反攻，將大市托番上去，恒指最後升12點，收報12143。
新世界發展（017）抽水12.5億元，唔少人預咗會跌穿配股價5元，但最後能以5.10元收市，已算承接力夠強。不過，據聞同新世界關係密切嘅里昂預計，新世界今次集資，不足以應付資金壓力，因為有110億元債務明年到期償還，就算計埋今次配股，手頭現金只有70億元，計落重有40億元未有着落。
中航科工（2357）不負眾望，首日掛牌勁升，收報1.47元，較招股價1.21元高出21%，即使計埋利息成本同經紀費用，利潤都相當不俗，遠比存款利息吸引，唔怪得咁多散戶走去認購人保財險（2328）。
黑客話，由於唔少證券行向客戶提供95-100%孖展認購新股，息率低至2%，就算出現百多倍超購，利息成本亦有限，只要新股有10-20%升幅，可以話穩賺，值博率相當高。據聞人保財險可能超購逾200倍，即係話利息成本又會高啲。
恒安國際（1044）主要股東及董事早前沽售4000萬股，每股3.425元，令股價受壓，但其後與大摩傾掂數，以每股支付0.60元溢價作為補償，提前終止大摩所持的恒安舊股認股權（行使價每股3.20元，05年中到期）。恒安大股東因為睇好恒安前景，所以才肯支付溢價註銷認購權，同時亦消除大摩行使認購權沽貨，對股價造成壓力。由此推測，恒安後市可看好。
阿 虎