十八歲小妹妹上戶彩，小學六年級就參加選美進軍藝能界，到𠵱家成為少男萬人迷，我羅拉都以為彩妹一定俾呢個大染缸，浸到變咗個壞女孩。而近日佢就搵咗五個小學就識嘅知心友一齊去浸溫泉，順便證明佢冇紅咗就唔識人。
當日彩妹拍完廣告瞓咗四個鐘就出發，但見到班friend即刻鬼打咁精神，佢哋又去沙灘堆沙、又釣魚又燒嘢食，夜晚重着晒浴衣傾偈傾天光。彩妹爆料話其中一個姊妹成日失戀，次次都會打電話同佢傾訴，一班人就會有特定嘅儀式幫佢忘記傷心，究竟係乜嘢儀式咁神怪？彩妹話：「呢啲係女仔秘密，唔話你聽！」咁彩妹又有冇失過戀呢？點知佢班friend把口重密過佢！
彩妹死黨話一直怕佢紅咗會變，但𠵱家周街電視都見到彩妹之後，佢重係儍妹妹一名。反而中學時有次佢要請假一個月，去菲律賓拍戲，又唔想太張揚，結果佢因為見唔到啲姊妹成日喊。
彩妹好滿足咁話：「我唔介意周圍嘅眼光，同佢哋出街，就好似有班保鑣保護我，今年五月我哋去迪士尼，俾fans認出我，佢哋重即刻幫我變身！」有咁多好朋友關心自己，彩妹又點捨得變吖！
另外彩妹前日接佢師姐菊川怜嘅棒，做西裝品牌AOKI嘅代言人，佢着套老西出席記者會，同佢平時嘅妹妹look唔同噃！