經紀陳早前提過，華瀚生物科技（587）可炒業績同埋收購業務。近期華瀚股價最高見過1.49元，之後在1.38至1.44元上落。
公司噚日公布業績，叫做有功課交。經紀陳話，隻股應該有動作跟尾，據講會收購分銷網絡之類業務。
華瀚公布截至今年6月全年業績，盈利8588萬元，比去年升咗13%，派息2仙，整體嚟講算係唔錯。噚日股價升0.01元，收1.46元，成交股數457萬股，金額664萬元。
另外，大廚重出江湖，剛剛入局嘅大華國際（600）亦傳出日內有收購行動。
自從大廚在月初入主到𠵱家，大華股價都唔知翻咗幾番，噚日又升11.56%，收0.222元。以大廚入股成本價每股0.05元計，𠵱家帳面已經賺到笑。
不過，經紀陳話幕後炒家目標遠大，要食大茶飯，唔會咁快就收手，因此點都要注入一些業務落間公司，先至有藉口繼續進行炒作。
慕容小初