有好多人都話，列斯件後衞洛基祖利亞唔係咁掂，踢法粗糙欠穩。睇佢前晚聯賽盃對曼聯，雖然個人梅開二度，但球隊最後都要輸波，似乎佢唔係咁夠班之外，重好「黑仔」㖭噃！
當我求大俠見到洛基祖利亞為球隊打開紀錄嗰陣，就諗番佢之前加盟列斯無耐，就喺聯賽食紅牌兼累球隊輸波，以及球隊防線唔見有大改善等「衰嘢」，當時覺得佢呢個入球，可以為呢位巴西國腳挽回多少面子啩！
加時階段佢又建一功，以為博到射十二碼決勝，點知最後都係輸埋！睇嚟呢期洛基祖利亞真係冇乜運行囉！
修咸頓前鋒比亞堤上周六聯賽，終於幫球會打破四百六十六分鐘無入波劣績，兼擊敗布力般，賽後同女友去餐廳慶祝，點知遇到酒鬼搞事發生衝突，好在比亞堤沉得住氣，無同人講手。好似前曼聯門將保斯尼治咁，食禁藥要退出球壇之餘，近期又因為打女友被捕，咁做唔值啦！
我求大俠欣賞荷蘭足總嘅制度，就係如果有球員喺聯賽領紅牌，你可以上訴；但上訴失敗的話，停賽場數亦會增加。等如犯咗法唔認罪，到最後被定罪判刑都重啲！最近阿積士件主力尹達華特領紅牌，就決定唔上訴嘞，事關佢𠵱家被判罰停賽三場，如果上訴失敗就更大鑊！
唔少過氣球星好似巴迪斯圖達等到中東卡塔爾搵食，聯賽即時人氣上升，但好多制度都留於封建時代，好似球員領紅牌，球會只要畀大約八千銀港紙，就有機會「贖身」，前巴塞中場哥迪奧拿就曾出呢招。我求大俠就覺得，要改善足球水平，廢除有漏洞舊制度就有定必要實行。
記得喺聯賽盃上一圈，樸茨茅夫及維拉等超聯球隊，面對弱旅都大勝，足智彩波膽「主其他」或「客其他」好易中。前晚輪到修咸頓及曼城登場，同樣作客對弱旅，曼城嘅「客其他」就由隔夜四十一倍，熱到臨場得番十倍！最後曼城只贏三比○，睇嚟都有唔少人損手！