港股噚日高開，一度升穿12300，阿虎以為好友要喺期指結算前，將港股挾高至12500水平至肯收手，點止升勢只係曇花一現，地產股受壓令恒指升幅收窄，收市報12130，只升38點，原來市場又傳出有地產股抽水。
收市後，新世界（017）搞批股，想抽水12.5億元，另外AngloAmerican配售利豐（494）股份，套現18億元，兩單deal共抽水逾30億銀。以近期港股成交額計，抽水規模唔算細，而且九倉（004）同信置（083）都傳可能會抽水。新世界今次在期指結算前進行抽水，淡友真係要多謝彤叔，否則好友有可能將期指挾上12500水平結算。
國中控股（202）早前傳話會買水廠，點知噚日揭盅，原來係用1.7億元入股國內上市公司強生控股12.87%。國中手頭現金唔多，3月底止只得5000萬元左右，最近與咸陽市簽訂的水廠投資意向，投資金額高達6億元，國中點樣集資實在值注意。不過，市場有人睇好國中入股上海強生呢單deal，認為國中可能一個轉手就賺成個開，屆時未必需要配股或供股集資。國中復牌收報0.62元，大升14.8%。
TCL國際（1070）公布業績前有春江鴨活動，股價勁升10.5%，收2.625元。TCL國際業績好唔好，阿虎唔太清楚，不過佢阿媽TCL集團計劃3個月內上市，集資20億元人民幣，自然要搵投資出路，TCL國際PE11倍唔算高，隨時會成為母公司增持對象。
阿虎