新任財政司司長唐英年新來新豬肉嘅蜜月期，即將屆滿，開口講嘢，亦難免開始有少少「阿董feel」，似乎唔係咁啱香港人聽嘞。
唐唐啱啱上任之後，好多人都勸佢醒醒定定，架車小心啲揸，因為冇幾遠嘅懸崖邊，喺冇幾耐之前，就有一個快車手，攬實件國寶揸架靚車兜風，天不怕地不怕，結果連人帶車飛插懸崖，變咗一堆廢鐵殘骸，到𠵱家重未執清災難現場。
經濟衰退，政府財赤，正如大教授話頭，喺人類歷史上，未出現過加稅可以有效醫得番好嘅先例。唐唐嘅「理財哲學」，如果真係乜都唔做，蹺埋對手等運到，等國家「屍爬」發功，自由行輸血，咁重或者有少少生機。
但𠵱家唔係。零售業啱啱至話生番少少，唐唐又話考慮徵收銷售稅。零售業養番肥少少，政府就伸把刀埋嚟要劏，咁經濟幾時至可以復甦？失業率幾時至可以下降？
開源如果淨係靠加稅就可以掂，呢個世界就唔會有經濟衰退，亦唔會有咁多政府垮台。陸路離境稅同銷售稅兩樣，如果焗揀一樣，兩害相權，寧願要離境稅，因為離境稅有選擇性，唔北上大陸洗頭桑拿嘅香港人，就唔使交，重間接留番啲消費喺本地，都重有啲建設性。
但銷售稅就唔同，柴米油鹽，樣樣要抽。百物嘅價格貴咗，但收多咗嘅，唔係利潤，唔可以袋落老闆個袋，而係轉交庫房，市民負擔重咗，挖肉補財赤，嗰頭政府各部門就照樣浪費（有審計署報告書為證），條數點可以係咁計？
唐唐唔理得咁多，去日本推銷香港。財政司呢個位，冇錯係好難坐，但
維港巨星匯一億包底，演唱會五年收益就歸美商會。呢啲唔知係乜嘢理財哲學呢？若果有乜問題唔明，唐唐大可以返屋企問吓媽咪：日後做套旗袍，買多盒化妝品，都要畀多啲喎，對於婦女消費者公唔公平呢？理財哲學，有時由媽咪喺餸菜價格嘅角度點番兩度，或者會好過睇凱恩斯嘅！
傳真︰2623-9278
電郵︰