大市噚日早段升勢凌厲，恒指曾升逾200點，但高位獲利貨湧現，結果以接近全日低位收市，但仍有38點進帳，成交維持在160億水平，達161.4億元，期指收報12165，升29點，高水35點。
恒指一度搶上12304，創下今個升浪的日中新高，但當炒國企股轉弱，令市場氣氛變淡，恒指最終仍上升，實全靠滙豐（005）頂住。不過，今次升市，時間之長、升勢之勁、幅度之大，真係好多年都未見過，升咗咁耐，調整必會出現，但幅度唔會大，整固完之後，明年個升浪重勁。
宜進利（304）高收1.01元，升5仙，成交3853萬股，係去年9月初3650萬股以來另一高紀錄，今次以大成交而突破0.97元阻力，短線上升目標指向1.15元，若日內出現後抽，將係低吸機會。
另外，金威（910）走勢快現突破，亦要留意。金威剛宣布上年度（03年6月年結）業績，果如所料的出現倒退，但現年度情況將大有改善，納米業務發展迅速，估計盈利可倍升。中資基金收集此股已逾兩年，今次勢會趁機發圍，股價翻一番機會好大。
升岡國際（485）走勢亦係處於突破邊緣，收0.28元，升1個價位，已係4次到頂，呢個位一衝破，升勢將會轉急，照度上去，短線上升目標係0.35元。
升岡大股東劉錫康對公司信心十足，由01年年頭開始，到今個月為止，一路都有增持，合共28次，未嘗減持過。大股東咁做好有啟示性，中線真係揸得過。
集團目前的定單已接到明年1月，總值約3億元，較去年同期增長逾20%，主要由新產品包括電視機、錄影機和DVD機所帶動。公司已投資1億元，在番禺興建新廠房，分兩期完成，全部落成並投產後，產能可增加40%。
03年度，升岡轉虧為盈，營業額13.7億元，升47.8%，獲利6111萬元，每股盈利2.3仙，期內有證券投資虧損1434萬元。現年度，由於不會再有證券投資虧損，加上公司持有投資組合約4000萬元，受惠股市上升而會有特殊收益，保守估計，全年盈利可達1億元，每股加權盈利（經今年7月配股調整）3.4仙，PE約8倍，05年度，新廠落成，盈利可進一步上升。
郭兆誠