黃家呢輪好事多多，繼黃英琦自動當選區議員，佢細佬黃英豪榮升新一屆世界十大傑出青年，本身係律師嘅港區全國政協委員黃英豪喺下個月五號到性都哥本哈根出席頒獎禮，同來自美國、法國、新加坡及馬來西亞等地嘅世界傑青得獎者接受殊榮嘞。
八方見到黃英豪個樣好後生，一啲都唔覺佢原來已經四十歲，啱啱符合參選世界傑青要係十八至四十歲人士嘅規定。黃英豪曾獲一九九八年香港十大傑出青年，今次再下一城，升級獲得世界傑青嘅榮譽，佢認為主要係因為過去積極推動兩岸青年交流，為中國統一鋪路，同時又熟悉法律，兼熱心中港法律工作。佢總結自己成功之道時，呼籲青年人要培養大志，建立永不言敗嘅精神，真係偉大。
咦，咁多樣功績，冇一樣係「愛黨愛國愛港」、擁護阿董治港喎，唔知係啲丹麥佬有眼光，定係黃英豪識閃身走位嘞。
傳真︰2623-9278
電郵︰