掌管地政嘅孫明揚局長噚晚同傳媒食飯，近日有維港巨星匯同平機會搶去填海風頭，孫公當然食飯食得好安樂。
佢話遲吓就會出一份諮詢文件，睇吓大眾對樓宇管理維修有乜意見，呢樣嘢本來好麻煩，但沙士之後，大家對環境衞生重視咗，加上搞維修可製造就業，所以相信冇咁大阻力。
講完硬料，又講吓輕鬆話題。孫公原來除咗賭馬叻，睇波亦好專家，個個禮拜六、日嘅節目就係對住電視機，佢重好把炮咁話自己最掂係英國波，想知邊隊贏問佢就得，之不過，佢喺英國讀書時捧到𠵱家嗰隊「牛津聯」，就降咗落丙組。
咁阿董亦鍾意睇波，咪有偈傾囉？孫公話佢唔係利物浦擁躉，所以冇乜共同偶像喎。
傳真︰2623-9278
電郵︰