星期日撞完車嘅陳智思，已經好番好多，八方噚日見佢都有去開立法會，但係左邊眼眉紅咗一塊，伯爾納爾德．陳話，唔係撞車傷痕，而係佢入院後第二日，個人重暈暈哋，結果去完洗手間返房時撞咗埋門，禍不單行，傷完再傷。
Bernard話撞車當日自己去深水灣游完水，約咗太太去聖堂，點知唔好彩撞車，太太喺聖堂又冇開電話，到太太離開聖堂，又到Bernard（陳智思嘅鬼佬名）入咗醫院唔講得電話。結果朝早十點撞車，要到中午十二點幾一點，有記者搵Bernard助手嘅時候，佢助手打電話畀佢太太求證先知道，真係嚇餐死。
Bernard又希望八方幫佢澄清一下，雖然份份報紙都話佢有心臟病，但係佢其實只係血管閉塞，一條血管去腦，另外兩條去腎，同心臟完全冇關。又係嘅，血管閉塞，咁都可以渲染為心臟病，重講到人哋垂危咁，濫用新聞自由，啲傳媒吖，真係曳曳囉！
（圖）陳智思左邊眼眉撞到紅咗，但係同佢之前撞車冇關係。
成啟聰攝
傳真︰2623-9278
電郵︰