凌晨搭小巴返屋企都會被打劫，真係駭人聽聞，今日打劫小巴，他日會唔會在屯門公路打劫巴士㗎？如果警察唔能夠將匪徒繩之於法，香港嘅夜市啱啱復甦冇幾耐，容乜易慘受打擊？打劫小巴出動「詐」彈、利刀、手槍，算係大陣仗，不過所得只係十幾個手提電話，萬餘元現款啫，奈何作賊？靚女公關C睇完段新聞喟然而嘆：「唔通啲賊真係窮得咁餓錢？」
問佢何出此言，公關C講一段活生生故事：「昨日（十月二十六日）晚上九點零成班人食完飯，在銅鑼灣崇光附近行街，十歲大嘅姪女O突然驚呼一聲，大家回頭一望，佢孭在膊頭嘅尼龍袋後面被人劏開一半，尼龍袋入面個荷包仔唔見咗。總共損失就係八達通一張、圖書證兩張、現款一百元；姪女O年紀細，嚇到面青，好耐先識講說話，至於喺邊度、正確位置、幾時俾人用大𠝹刀割袋，無可考究咯。只記得崇光門前人頭湧湧，掛住拖姪女O隻手向前望，點會睇到匪徒割袋吖！」
嚡，以前話驚扒手打荷包，點知𠵱家都費事空空妙手咯，直情拎起張刀就割就劏手袋，咪話唔得人驚。做乜事要劏細路嘅尼龍袋呢？木宰羊，好多人孭背囊行街，拉鍊在後面，以後因住在銅鑼灣、旺角鬧市成為獵物。意大利、西班牙有唔少匪徒當街用刀割女遊客手袋，如此風氣，吹來香港嘅話，警察有排煩。大家出街，小心啲呀。