汽車專題：超級跑車雲集北京<br>慶祝法拉利進入中國十周年

汽車專題：超級跑車雲集北京
慶祝法拉利進入中國十周年

今年剛啱係法拉利跑車引入中國10周年嘅大日子，作為港、澳及中國代理商嘅勵駿汽車，為此特別搞咗個別出心裁嘅法拉利及瑪莎拉蒂汽車巡遊活動，一眾香港及內地嘅車主，各自駕駛心愛座駕，由天津出發駛經首都北京天安門廣場，直達人民大會堂。有幸筆者能參與其中，踏入大會堂前見證法拉利跑車進入中國十周年嘅慶祝活動呢！

本報記者陳偉林北京現場直擊

著名超級跑車製造商法拉利（Ferrari），一直係不少車迷夢寐以求嘅DreamCar之一，皆因外形及車廂布局能予人不錯觀感，強橫嘅性能表現更教人一試難忘；今年適逢法拉利跑車進入中國十周年，故代理方面特別安排多部來自香港及國內嘅法拉利及瑪莎拉蒂跑車，由天津直駛往北京，參加慶祝活動，並順道介紹全新瑪莎拉蒂（Maserati）Quattroporte豪華轎車呢！

■整個十周年紀念活動，於天津下榻嘅酒店作起點，車隊浩浩蕩蕩駕車行走百多公里直達京城。

天津起步掀序幕
是次十周年紀念活動，係由位於天津下榻嘅酒店出發，並駕車行走百多公里直達北京；出發前，為數二十七部嘅法拉利及瑪莎拉蒂跑車齊集酒店外，並惹來不少當地市民圍觀，隨後當旗號一揮，旅程便隨即開始。

人民大會堂前彰顯身份
經過百多公里嘅旅程後，車隊便到達位於北京嘅人民大會堂，一眾車主及傳媒朋友都紛紛拍下呢個難得一見嘅場面，而出席是次盛會嘅車廠高層與代理要員，感到高興之餘，亦要來一張大合照咁話。

■酒店外鮮有排列出二十多部超級跑車，吸引當地市民圍觀。

■車隊排列井然，場面壯觀之餘氣氛又見凝重。

■法拉利車廠高層PieroFerrari(右一)，跟勵駿及快意汽車主席RichardLee(右二)，及勵駿汽車董事長夏德成夫婦齊集大會堂前，倍見喜上眉梢。

■身為瑪莎拉蒂代言人之一嘅著名歌手任賢齊，亦有出席是次慶祝活動。

■難得一趟雲集多部超級跑車於廣場上，令當地市民為之嘩然。

瑪莎拉蒂Quattroporte
新版惹人愛
瑪莎拉蒂向以生產高性能豪華房跑車而聞名，其中新近推出嘅Quattroporte，經已係自1963年第一代面世至今嘅第六代新車，加上汽車設計大師賓利法連拿（Pininfarina）嘅筆觸，響呢部長達5.5米轎車身上嘅細緻勾劃，單係賣相經已教人有獨特豪邁感，惟新車快者都要明年中方有機會抵港；若你想近距離認識部車的話，就真係要耐心等吓喇！

■由賓利法連拿設計嘅全新瑪莎拉蒂Quattroporte，絕能顯現出一陣誘人魅力。

瑪莎拉蒂Quattroporte小檔案
引擎：4244ccV8DOHC
馬力：400ps/7000rpm
扭力：46.0kgm/4500rpm
傳動：6前速半自動波MDS，後輪驅動
尺碼：5502×1895×1438mm
軸距：3064mm
車重：1930kg
0-100公里：5.2秒
極速：275km/h
新車售價：約港幣100萬起
查詢：快意汽車（26278933）

■車廂布局突出吸引，而且重有一份乘坐舒適感。

■一台4.2公升V8偈表現強悍有勁，令人留有深刻印象。

法拉利275
成另類焦點
呢部產自1965年嘅古典開篷跑車，用上一台3286ccV12偈，馬力輸出為280ps/7600rpm，同樣出自賓利法連拿嘅設計手筆，據知當年產量不過二百多部，而其中屬右軚版本，亦不過27部而已，今趟車主跟呢部法拉利275出席呢項活動，真係給國內車迷有大開眼界嘅機會。

■頭輪拱兩旁有一排散熱柵格配搭，份外別致有型。

天下第一雄關嘗佳餚
旅程嘅尾聲，有關方面就安排一眾賓客，前往有天下第一雄關之稱嘅居庸關，品嘗自助餐，而靠近場地更停泊有多部法拉利及瑪莎拉蒂跑車，如此壯觀場面實在難得一見。

■座艙陳設恍如新車一樣，當中一雙真皮座椅，重好有彈性及妥貼感。

■以桃木鑲嵌嘅三幅式軚環，好有一份古典味。

釣魚臺國賓館賞新車
隨後有關方面更安排眾人前往釣魚臺國賓館，參加慶祝飲宴；當日筵開三十多席，一眾車廠高層、車主及汽車傳媒齊集一堂，場面可謂十分熱鬧。與此同時，代理方面更安排有全新瑪莎拉蒂Quattroporte豪華轎車在場展出，令當日氣氛推至另一高峯呢！

■多部法拉利及瑪莎拉蒂跑車雲集於長城上，形成強烈嘅新舊對比。

■城樓外掛有法拉利及瑪莎拉蒂嘅旗幟，可謂十分威風。

後話
今趟筆者能參與是次慶祝活動，並能乘坐法拉利及瑪莎拉蒂跑車，由天津直達北京，實在感到萬分榮幸及興奮；而據勵駿及快意汽車主席RichardLee所講，位於上海嘅一級方程式賽車場於明年三月落成，極有可能會成為世界一級方程式大賽其中一個賽站，屆時代理方面又會有一連串慶祝活動云云。相信大家與筆者一樣，都希望呢一日快將到臨呢！

■當全新瑪莎拉蒂Quattroporte呈現響一眾賓客眼前時，即惹來一陣哄動。

■場內筵開三十多席，場面十分熱鬧。