早前廉政公署在娛圈採取「舞影行動」，拉咗無綫高層、唱片公司高層、同埋娛樂公司老闆，呢件事當時震動娛圈，噚日將軍澳電視廣播城又突然出現咗一大班廉政公署人員，個個都西裝筆挺，重以為又有大事發生，問清楚之後，原來係無綫幫廉署製作《廉政行動2004》，演員方面有最近成日俾人喺街度叫黃sir嘅黃秋生，同埋幫好多執法機構拍宣傳片嘅方中信、石修、利嘉兒等。
黃秋生平時甚少踏足無綫電視廣播城，好多後輩見到佢，都「哥」前「哥」後，認真威風，好似魏駿傑一見到秋生，就好大聲咁叫「師兄」，傑仔重話師兄話乜就乜喎！
劉愷威就重好笑，佢喺自我介紹時，重開咪叫秋生睇住佢，搞到秋生都唔知點好。秋生原本好平靜，好鬼有師兄風範，但係一講到最近吳綺莉個女小龍女嘅相被公開，佢就有啲火，秋生話：「小朋友要protect，大人就點搞都得，我唔係理人哋家事，呢個係保護兒童問題，父母係要做嘢。」
女子組合2R噚日喺銅鑼灣出席港台嘅「全港普通話歌唱大賽」宣傳，2R重寄語參賽者比賽時，唔好怕醜同拘謹就最緊要。2R又話佢哋嘅新碟銷量好，會出第二版，而佢哋嘅寫真集入面，就有一張好似俄羅斯女子組合t.A.T.u.親嘴嘅相，2R話：「我哋錫錫係為親情，唔係為宣傳，我哋接受唔到t.A.T.u.嘅開放程度。」如果係為親情，喺屋企錫就得啦，使乜喺寫真集度出呢？
何超儀同陳子聰一早講咗會喺下個月拉埋天窗，最近超儀就一直忙緊籌備婚禮，之前本來話佢哋會喺澳門塔行禮，而超儀呢輪開始派帖，重訂咗下個月二十九號喺灣仔君悅酒店擺酒，嗰陣何超瓊同許晉亨嘅婚禮都搞咗三日，唔知超儀會唔會效法呢？希望到時超儀同子聰呢對火爆新人見到記者，唔會鬧人啦，話晒係開心日子嘛。
澳門下月會舉行《2003歌舞星輝耀濠江滙演》，噚日表演嘉賓之一嘅Cookies同有份籌辦嘅何鴻燊四姨太梁安琪都有出席喺澳門舉行嘅宣傳活動，Cookies一見四姨太即賣口乖，勁讚佢後生，成員Miki重話：「四姨太青春可人，可以做Cookies新成員。」四姨太聽到後笑到鬼咁開心，但就話：「講笑咩，佢哋咁後生，我都唔好意思行埋去，做阿媽咩。」
陳奕迅（Eason）噚日朝同女友徐濠縈出現喺金鐘高等法院，平時一身便服look嘅Eason，重特別着上好鬼筆挺嘅黑色西裝，同女友戴住黑超現身，不過Eason對於記者嘅提問，一概冇乜回應，而之後佢哋就齊齊坐保母車離開。
