巨胸女口角電玩商打埋一份
佐敦、Jodie隻揪揸喉掹衫

擁有32FF上圍嘅英國騎呢名模佐敦（Jordan），同另一位34D巨胸模特兒JodieMarsh一向有唔少牙齒印。早排Jodie公然大彈佐敦又老又out，話英國美豔女王嘅地位應該由佢取代，Jodie重向佐敦宣戰，邀請佢上擂台隻揪。

雙乳藏武器
雖然呢個令人望穿秋水嘅擂台戰未有得睇住，不過電玩公司Capcom早前就食住條水，創作咗一個名叫《ViewtifulJoe》嘅遊戲，當中重加入佐敦同Jodie呢兩個角色。
話說呢個遊戲，係講一名叫阿Joe嘅卡通英雄，打勻全世界嘅壞人，而佐敦同Jodie，就係其中一幕對打嘅主角。喺遊戲裏面，只要佐敦一出現，就會同Jodie對打，玩嘅人可以令佐敦同Jodie使出揸喉、扯頭髮、起飛腳同掹衫之類嘅絕招。不過，據玩過嘅人話，佐敦嘅功力遠超於Jodie之上，因為佐敦雙乳隱藏秘密武器，認真犀利。

或出特別版
而Capcom嘅發言人重話，若果今次個遊戲反應理想，佢哋唔排除幫Jodie同佐敦出一個特別版電玩，等佢兩個打餐飽。計我羅拉話，Capcom不妨揼多嚿錢請佢兩位阿姐齊齊現身，肯定吸引到唔少叔叔同伯父入貨。