美聯物業落重本自製赤柱富豪海灣售樓書，成本高達二十萬，總共印咗三萬本。
售樓書一向都係由發展商負責，愈豪嘅盤，樓書就愈精美。富豪酒店就打破呢個定律，佢哋嘅富豪海灣大大話話都賣咗兩、三個月，都係用緊嗰本大大份嘅臨時樓書（左），重係用一叠A3紙釘裝而成，加張透明膠就當封面，非常慳皮。成本書只係印咗各類洋房嘅圖則同位置圖，半句文字介紹都無。
發展商慳水慳力，班代理就慘嘞，拎住本咁嘅樓書去推介一個動輒四千萬嘅超級豪宅，真係冇乜說服力。
雖然發展商話公開發售時會重新印過一批售樓書，咁即係重要等多半個月，唔怪之得美聯的起心肝自己印，重要喺發展商面前，話呢本只不過係精裝樓書。
已經喺上海開設六間專門店，以代理當地中高檔住宅、商舖為主嘅金豐易居，據公司房屋銷售董事副總裁吳濱講，佢哋選擇商舖嘅面積一定要係二千五百至三千五百呎之間，點解要咁大？因為除咗要有足夠地方同客人傾談一、二手住宅租售市道外，重要喺舖內闢個一手樓盤展覽廳，無番咁大間點得。今年佢哋重會大展拳腳，將分店總數增加至三十間。
信和集團嘅樓盤，出名以會所同園林布置取勝。佢哋嘅馬鞍山嘅海典灣，喺兩年前911事件後開售，當時以月供1蚊一方呎做噱頭，好快就賣得七七八八，一度成為賣樓傳奇。
呢個樓盤今日開始收樓，噚日發展商帶傳媒參觀會所，有成六萬方呎，位於二樓，設備齊全，最特別係將第六座三十九樓頂層單位，改裝做埋會所，名為頂層空中會所（SkyClub）。發展商特地將該座兩部直通頂樓的電梯設落地玻璃窗，搭電梯時可欣賞馬鞍山郊野公園、吐露港同園林泳池。
SkyClub有成四千幾呎，設三個豪華宴會廳供租用，可以做私人派對同宴客，平台嘅空中花園，就有BBQ場地。
今個月樓市靜番，代理生意應該冇上個月咁多，蘭西睇中原網頁，今個月截至28號，佢哋本港住宅同工商舖部門佣金收入，比上個月減少超過兩成，但總數都有九千一百八十九萬，好大機會再突破一億大關。
噚日中原開內部會議，除討論今個月再派五百蚊畀後勤員工慶功外，聽講董事總經理黃偉雄重落實，會撥出部份盈利做花紅，即係後勤員工年底一定有花紅分。早前黃偉雄重話要睇埋年尾條數先，今次提早有決定，睇嚟對未來兩個月嘅業績都好有信心。
雖然好多人指香港優勢漸減，但環球香港商業協會聯盟主席呂頌樂噚日同蘭西講，外商仍要借助香港人幫手打開內地市場。
佢更舉例，話有次同個美國商家到廣州傾生意，遇上塞車，個司機竟然開到對面條線插隊，嚇到佢哋冇咗半條命，個美商重話，都係搵香港人幫手好過。
呂頌樂又話，外商對到中國投資有好大興趣，但問題係香港人畀外國人的印象好消極，淨係識投訴政府，小小事就埋怨，因此佢認為，港人應積極做啲有建設性嘅嘢。
蘭西
電郵地址：