郭晉安昨日在灣仔一個約五層樓高的廣告牌吊架上拍攝捉賊戲，親身上陣的安仔動作頗敏捷，但一度跣腳，幸同場的臨時演員及時上前扶他一把，險象環生。
郭晉安、江芷妮和蔣志光等，昨日在灣仔鵝頸橋附近拍攝無綫新劇《隔世追兇》捉賊戲。
飾演警察的安仔綁上威吔，即爬上五層樓高廣告牌的吊架上，動作敏捷的他混亂中失去平衡，幸好飾演被他追捕的臨時演員見狀，眼明手快地伸手扶他一把，最後亦一take完成。
安仔表示拍攝這場在高空吊架上捉賊戲份前，又曾拍攝一場從二樓跳落貨車的戲。他昨日拍攝前說：「我一早做足安全措施，攝製隊亦到過現場視察環境。但係近幾年我都未試過親身拍呢啲咁危險嘅鏡頭，今次拍呢場戲順便睇吓自己得唔得。最好笑係附近啲人搭巴士經過，見到都嚇一跳。」
其後提到拍攝期間差點失手，安仔說：「我都驚㗎，當時感覺似笨豬跳，我雖然唔係畏高，但係行每一步都好緊張，啲血漿落晒隻腳度，咪跣囉，我對手重有啲抽筋㖭！」
安仔續說：「見個架搖搖吓，都擔心可唔可以承受到兩個人嘅重量，我上個月保險到期，不過已經續咗保。今朝重專登唔食早餐嚟開工，因為怕吊威吔好易嘔。」
拍劇期間吸引途人圍觀，警察路過更上前查問，後來知道是拍劇便離開。而江芷妮和蔣志光在劇中都是扮演警察，二人昨日亦拍攝鬧巿捉賊戲。
採訪、攝影：卓寶花
