自從調景嶺鏟平咗，國民黨喺香港嘅基地隨着台灣嘅政局而淡出，加上九七後香港成為中華人民共和國嘅特區，國民黨更加冇路行，特區政府揣摩上意，百般封殺阻撓，於是有關事宜就好似放棄咗嘅橋頭堡，冇人想理。
不過，今次中華民國老夫人宋家三小姐美齡離世，唔知係咪因為佢一生充滿傳奇，橫跨三個世紀，港人對佢嘅興趣比想像中濃厚，駐守特區嘅唯一較活躍親中華民國團體「港九工團」嘅李國強（唔係同名同姓嘅土共）同八方講，本來工團只想喺月底搞個內部嘅追思會，但係由於查問嘅人太多，佢哋諗緊要搵個較大嘅地方，等公眾人士都可以嚟憑弔一吓呢位「中國嘅永遠第一夫人」。
至於宋美齡生前，就冇聽過佢曾踏足香江。為咗表示尊重，李國強重想為已故蔣夫人出本小冊子，相片同資料估計要同台灣方面借，但係啲費用就有待有心人捐獻。咦，小心喎，搞大咗，又變咗搞「兩個中國」，啲土共一發火，阿董又要焗住搵林D8出頭鎮壓，都係畀蔣老太安息喇。
傳真︰2623-9278
電郵︰