堪稱本年尾重頭電影之一嘅《22世紀殺人網絡3驚變世紀》，好快就會破天荒全球同日同時公映。
而香港就會喺下星期三（五號）夜晚十時，上映終結篇。一班《22世紀3》主角好快要飛勻全世界宣傳，所以前日聚首洛杉磯，出席全球第一個首映禮。
不過今次嘅首映，一班主角似乎冇外人咁搶鏡，點解？話說離婚之後愈嚟愈風騷嘅莎朗史東（SharonStone），當晚以嘉賓身份出席，同《22世紀3》嘅法國男演員林伯特韋遜（LambartWilson）鬼咁煙韌，林伯特一時攬住莎姐條腰，一時又面貼面擺出副情侶款，其他演員冷不提防就俾莎姐搶晒鏡。
講番主角奇洛李維斯（KeanuReeves），雖然佢依然俾攝記圍住嚟影，不過最近有消息話佢細妹嘅癌病有復發迹象，難怪佢一副苦瓜乾咁嘅面口！羅拉真係希望佢細妹嘅病情可以穩定啲啦！
另外，喺《未來戰士纖滅者TX》飾演奸角嘅姬絲坦娜洛根（KrisitannaLoken），前日着性感肚兜晚裝上陣，省鏡到暈，就算珍達娉琪（JadaPinkett）點同老公韋史密夫（WillSmith）攬攬錫錫都冇人理；而生完BB嘅嘉莉安摩絲（Carrie-AnneMoss）重未修身就走出嚟，梗係輸得慘！
美聯社圖片
