半紅不黑女星俾男星搞大咗個肚，生埋BB之後，諗住可以從此富貴，點知男星一向孤寒，要問佢攞錢真係幾難。
不過半紅不黑女星都不愁寂寞，佢生完冇幾耐，就同一個髮型師拍拖，因為男方冇乜水，女星嘅一個惡死長輩，就反對佢哋來往，女星唔聽話，結果長輩就搵人淋個男仔鏹水，搞到個男仔膊頭以下半邊身都中晒招，真係惡得交關。
睇番嗰個私生BB，一日一日咁大，如果女星帶個BB出嚟，男星都會幾煩，所以男星最後都搵人畀咗筆掩口費個女星。不過唔知筆錢使晒之後，女星重會唔會再有小動作就唔知啦！所以話呢個世界，風流係要付出代價嘅。
內地噚日有消息話周渝民撞車死咗，後來又話佢撞車受傷。馮仁昭於是打去畀周渝民台灣經理人，佢話仔仔下午返過公司，點知佢走咗冇耐，電話就響個不停，唔少Fans查詢有關仔仔撞車嘅消息，經理人於是就打畀仔仔，仔仔知道後都好愕然咁話：「我沒事。」有傳呢單嘢係一班仔仔Fans不滿佢冇為《狂愛龍捲風》同徐若瑄嚟香港宣傳，所以特登放風出嚟。
陳曉東日前去咗上海出席「2003萊卡風尚頒獎禮」，喺後台咁啱見到韓國當紅小生李秉憲，大會即刻介紹佢兩個認識，佢兩個重互笠高帽，東東事後就話：「我重未睇過李秉憲嘅戲，不過我媽媽好鍾意睇韓劇，都算係佢嘅fans嚟，媽媽知我見到李秉憲，重猛問我佢真人係咪咁man㖭。」咁唔知東東有冇幫佢媽媽攞埋簽名呢？
黃伊汶（Emme）噚日到港台接受訪問，入秋後不少女星都會添置秋冬新裝，Emme亦不例外，不過Emme話每次換季佢就會好煩惱，因為屋企塞滿一大堆舊衫。
Emme話：「本來我想將啲衫攞去朋友嘅二手店寄賣，但點知沙士事件後，我朋友已經執咗間舖，搞到屋企𠵱家有兩大箱衫，重有一箱放咗喺助手度。」其實Emme可以將啲舊衫捐畀慈善機構，幫吓人，都好呀！
《繼續張國榮慈善音樂會》日前順利舉行，籌得嘅善款扣除開支後，共籌得一百一十多萬，「兒童癌病基金」同「護苗基金」分別獲得五十多萬善款。而日前商台就搞咗支票頒贈儀式，護苗基金主席蕭芳芳未能親身領取支票，但不忘透過感謝卡話：「全憑諸位的汗馬功勞，我多想親自趕來向諸位表達我的感動和感激。但身體違和，只能藉此卡向諸位深深一拜。」
