好友大報復，升幅少過20%嘅窩輪，都唔能夠打入40大。是日輪王係電盈Call輪9766，收42仙，升79%。9766漸屆末日，下月初夠鐘，溢價0.4%，槓桿率13.5倍。正股（008）升25仙，隻輪有咁勁表現，當然係因為槓桿率夠爆（前日23倍），但經過昨日急升後，爆炸力得番一半多啲，而且時日無多，值博率降低。
實際啲，博正股重有得去，搵電盈Call輪炒，可以揀9791，呢件爆炸力當然細啲，但勝在壽命長，買賣易，萬一睇錯正股，殺傷力都冇咁大。隻輪明年3月到期，輪價1.31元，溢價2.8%，槓桿率4.3倍。上周最高價挨近1.70元嗰頭，𠵱家水位仍然唔細，諗得過。
周一推介嘅中移動Call輪9861，昨日彈跳32%，收47.5仙，雖然升幅唔細，但數據仍靚，溢價1.1%，槓桿率4.7倍。
市場錢多，資金倒落大藍籌，重磅股啱芬佬玩。長實（001）先一排與新地（016）同價，𠵱家相差1.75元，博追番上去，炒長實Call輪有着數，正路對象係9065，明年3月到期，輪價82仙，溢價6.1%，槓桿率7.8倍，但成交嫌疏，似乎得莊家一人玩晒。
章盛