「電飯煲大王」蒙民偉日前請咗全港名嘴食晚飯，喺灣仔君悅筵開四席，當中有一道菜式叫做秘製咖喱薯仔炆牛腩，原來呢味小菜係蒙民偉嘅撚手菜式，係老友先至有得食。
味咖喱牛腩又的確色香味全，八方唔食得辣都死頂，蒙生嘅大仔蒙德揚話，老竇煮嘅呢味咖喱佢由細食到大，秘訣在於加咗蘋果汁，所以特別香甜。
食咖喱就梗係要有白飯送啦，於是大家就話啲飯好似腍咗啲，蒙德揚馬上答話，今次唔記得帶埋個樂聲牌超級電飯煲嚟煮畀大家食，下次再食過。話口未完，蒙公子同一眾食家已經成頭大汗，證明啲咖喱係正嘢。
八方忽然想，蒙民偉鍾意整咖喱，唔知同佢當年（六十年代）逐家逐戶推銷新產品電飯煲有冇關？因為睇港大最近同佢出個本自傳，先知佢當時為咗要示範啲電飯煲幾好用，不惜攞埋個煲、糯米同臘味去到理髮店煮糯米飯。蒙老嘅成功得來不易。
傳真︰2623-9278
電郵︰