上海市市長韓正帶團落嚟香港，貌似風趣，狀甚開明，又話上海係一個發育緊嘅青年，而香港已經係一個唔會再長高嘅成年，喺一陣擦鞋嘅掌聲同埋無限仰慕嘅眼光之中，忽然傳來上海即將「追上香港」嘅一件搞笑消息：上海律師鄭恩寵，因義務幫助靜安區居民打官司，抗拒周正毅收地起樓與靜安區政府勾結，剋扣賠償，點知以「洩露國家機密」罪名，被判入獄三年。
咁都未止，其中一名被迫遷嘅舊居市民，佢個女住喺香港，屋企遭人淋漆恐嚇。嘩，上海嘅惡勢力，真係追到嚟香港喎。
前日，阿董意氣風發，宣布同韓正實行八大領域經貿合作嘅「框架協議」，包括畀上海佬學習港口碼頭嘅管理知識。八方噚日話，阿董將香港啲優勢教晒上海，香港咪更快會俾上海佬追過頭？今日，八方要轉軚，大讚阿董醒目：好彩同上海「合作」嘅項目冇包括「法治人權精神」，憑呢樣嘢，香港得英獨厚，幸福地繼承咗英國式法治制度，上海愈判多幾個律師坐監，香港就愈有優勢！
對於鄭恩寵呢位受害人，只不過係為貧苦居民出頭，打官司係專業天職，點解反而會受到「黨和國家」判監三年嘅莫大恩寵？呢啲係中國極之古怪獨特嘅國情、內政，亦關乎中國人民喺胡溫新體制領導下嘅民族尊嚴，外人無謂指指點點，說三道四。
不過正如八方擒日講：上海佬可以學香港、學美國咁起七八十層高嘅大廈，可能亦最終會學識喺大廈地底點樣搭通埋啲屎渠，但人權、法治、自由，呢啲咁高級咁抽象嘅嘢，好彩上海同中國係一世都學唔識嘅。
而香港嘅律師，一百五十幾年來，都毋須因為同政府打官司而坐監，今後，阿董同煲呔曾如果去外國宣傳香港嘅優勢，就記得帶同鄭恩寵案嘅全套資料，連同幻燈片，多多向國際商界宣傳，快啲嚟香港投資，因為香港重有少少殖民地時代嘅老本。香港六百萬人，無限感謝上海法院嘅判決，上海法院令香港人恢復番少少自信，係一陣及時雨，多謝，多謝！大陸呢啲律師，手指拗出唔拗入，竟然同人民政府瘋狂對抗，拉喇，判多幾個喎，千祈咪手軟呀。
（圖）周正毅（左）與毛玉萍搞出個大頭佛，最慘係連累埋鄭律師。 資料圖片
傳真︰2623-9278
電郵︰