車路士最近忽然收起王牌前鋒基斯普，令人大惑不解，而蘇格蘭傳媒終於幫球迷解開疑團，話原來係基斯普個太太小產，於是會方決定畀佢唞唞。呢個消息收得好密，估唔到好似《太陽報》呢啲擅長踢爆人私隱嘅英國小報都揭發唔到呢件事，都算失威囉。
不過我求大俠最想講嘅並唔係呢樣，而係想讚吓基斯普。據聞呢件唔開心嘅事發生喺前個禮拜車仔作客阿仙奴前夕，相信大家都記得基斯普嗰場波入咗球靚波一度為車仔扳平。如果小產消息係真，即係話基斯普強忍英雄淚重能夠射入世界波，咁有職業道德，不愧係世界級射手，值得敬佩。
祖雲達斯總監莫治宣布季尾就會俾自由身嘅戴維斯離隊。據講，本來有心簽佢嘅羅馬因為財政唔多掂，照計已經打退堂鼓，而最近有消息話佢喺米蘭買咗間屋，睇嚟去米蘭發展機會幾大。當年戴維斯響AC不歡而散，唔通下一個落腳地係國際米蘭？
前阿根廷國腳韋華斯決定掛靴，以一個啱啱三十四歲嘅後衞嚟講應該可以踢多陣。退休前踢河床嘅佢話已經對足球失去熱誠，講到鬼咁欷歔。又係嘅，當年佢踢阿仙奴因為犯咗一個防守錯誤，俾雲格雪藏；去到國米連同胞古柏都唔重用佢，可謂屈到病––心病難醫，惟有掛靴囉。
范志毅前晚幫澎馬流浪喺預備組對南華，唔單止兩黃一紅被逐，出場時更因唔滿意判決追打球證，好彩球證後退時跌倒冇俾打中；雖然預備組攞紅牌，但唔會影響佢周六對愉園時領軍。不過，我求大俠奉勸范將軍，嚟得香港做球員兼教練，就要向班後生仔樹立好榜樣嘞。
NBA新球季今日啱啱開鑼，但姚明就已經攞咗頭彩，呢位中國中鋒以平均二十點二嘅高分，榮膺季前賽得分王，身為中國人，我哋當然希望呢個數字有代表性，但係觀乎季前賽有好多球隊嘅主將都因傷缺陣，或者保留實力，似乎都係咪咁快開心住！