講吓講吓，社會福利署署長林鄭月娥已經夠鐘升職走人，調去做孫明揚個常秘，即係榮升D8，專責規劃及地政。
噚日佢阿姐出席港大家庭研究院開幕禮，應該係佢重做緊署長嘅最後一次公開活動。研究院董事會主席黃匡源話，林太為社會服務做咗好多嘢，大家都好唔捨得佢，所以特別送上一大紮靚花，以示謝意。
林太當然好開心，佢同八方講，自己真係好勤力，呢個星期五係社署lastday，周六就向孫公報到，份新工梗係富挑戰性，因為第一單case要處理嘅，就係中環填海工程，同鄭大班交鋒。
計一計林太主政嘅呢幾年，喺社會服務方面的確搞咗唔少新意思，好似一筆過撥款，削綜援，有讚有彈，未做完嘅就等接任人鄧國威繼續努力。
（圖）林太最後一次以社署署長身份出席公開活動，黃匡源特別送花感謝佢對社會服務嘅貢獻。
傳真︰2623-9278
電郵︰