有麝自然香，家在錦繡花園的Carmen，為了買到有水準的蔬果，寧願花上20分鐘車程，也要到這個元朗市區安寧街的俊賢坊露天街市，就係貪佢款多價錢平。今次就由她帶大家走一圈，順便講解一下揀生果的秘訣。
記者：羅惠芬 攝影：陳陶鈞
示範：元朗讀者Carmen
問十個女孩子，十個都會話愛食生果，兼且原因劃一──食幾多都唔怕肥。Carmen說得更白，「生果食得再多，都唔怕嚇親男友。」
自少已是乖乖女的她，得閒就陪媽媽上菜市場，由齋跟慢慢培養出行街市的興趣，重學埋不少揀靚貨心得，得閒就會獨個兒到街市買生果。「聽生果檔阿姐講得多，自己都學咗嘢，買生果就唔怕俾人呃。」
她平日最愛到的俊賢坊街市，地方不算大，麻雀雖小，但五臟俱全，魚肉菜雜貨店齊全，加上環境夠乾淨，好似Carmen咁講究衞生的就最啱。「最吸引係生果檔又多又大，而且每檔所賣的生果各有特色，每次都可以滿載而歸。」好似今次佢示範做生果啫喱，就第一時間話要去俊賢坊買生果，重畀佢好彩地搵到街市少見的士多啤梨，約$20-$25盒，比超市重平㖭！Carmen話：「長圓錐形的士多啤梨最靚，果色鮮紅有光澤，聞落又有陣香味就最啱食。」
因為有一個愛甜食的弟弟，姊弟情深的Carmen平日最愛鑽研各式甜品，弟弟就是最忠實的支持者。好似弟弟話要食啫喱，Carmen立即自創這款啫喱凍，還為其賣相費盡心思。「用士多啤梨，整到成個藝術品咁，自己見到都好想食。」
用咩料：
荔枝啫喱粉 1包
魚膠粉 1湯匙
消化餅 8塊
牛油 50克
士多啤梨 4粒
小貼士：
1.餅碎份量不可太少，否則很難將士多啤梨固定。
2.從雪櫃中取出餅碎後，反轉杯，測試餅乾碎已固定好，才可插入士多啤梨。
果檔1
多外國入口貨
月亮是外國的圓，生果亦一樣。例如榮興鮮果檔，所賣的生果多由外地運來，貪外國陽光雨水充足，種出來的生果自然比國產貨靚。Carmen說每次行街市，第一時間都會來這檔幫襯。「價錢合理，最重要係夠新鮮。」（榮興鮮果檔）
包靚美國加州提子
美國加州陽光充沛，出產的提子自然有水準，無核而且大粒，食落比普通提子爽脆和香甜得多。果檔阿姐話，開箱後會逐串檢查，有爛即掉，「包靚！」Carmen就教路，要揀表面多粉末的，「在燈光下照一照，色澤通透就靚，放冰格雪凍後加奶油一齊食，重好好味㖭！」
當造日本富有柿
由日本入口的甜柿，共有「次郎」、「花御所」及「富有」3種，本地最常見的富有柿，味道比其餘兩者較多水份和甜味。此柿每年10-11月份當造，果身重約200克，選擇時揀外形愈少褐色斑點的愈好。
食味甜美國雞心蜜李
跟提子一樣，李身愈多白粉，就表示剛開箱不久，曾被觸碰的次數不多。呢款雞心蜜李來自美國，食味較一般布冧甜，Size亦略大3。Carmen話拎上手要軟硬適中，太軟身的話就要放入雪櫃至襟擺。
款多夠特色
愛新鮮的Carmen，認為生果檔貨種不離幾種，買得多都悶。她另一推介燕記生果檔，皆因佢賣基本生果品種外，還有不少較少見的果種，例如龍珠果，夠晒新鮮。重有，檔主燕姐好好傾，對各種生果的藥用療效亦瞭如指掌，有問題搵佢最啱。（燕記生果檔）
龍珠果青綠色不宜食
生於山邊和溪旁的龍珠果，生時有毒呈青綠色，熟透後轉橙黃色才可食，有生津止渴的作用。除即吃外，可連兩個蛋黃攪拌後炒熟來吃，對有扁桃腺發炎者最好。平時要賣十蚊一磅，𠵱家平咁多，抵買。
獼猴桃即奇異果
產自中國的獼猴桃，即是我們口中的奇異果，不過味道就甜得多，怕酸者最啱。它含有豐富維他命E，多吃可以令皮膚更有彈性，難怪Carmen咁喜歡吃。佢話，無論獼猴桃或奇異果，拿上手時有微軟的感覺，就表示它已成熟可供食用。
菜平又新鮮
自言前世可能是一隻牛的Carmen，每餐無菜不歡。尤其踏入11月份，更是蔬菜最靚的季節，學菜檔阿姐話齋，真係樣樣菜都咁靚。不過，Carmen話買菜都係揀全街市最大、菜種最多的長城菜欄，「佢啲菜真係好新鮮，媽咪次次都幫襯佢，重不時有特價菜賣㖭！」（長城菜欄）
品質靚粟米
粟米粒排列得好整齊，一望就知唔係將貨就價，五蚊有三條，認真抵。
綠油油莧菜
靚菜期，Carmen話菜比瓜類好吃得多。好似莧菜咁，綠油油，用油鹽水烚熟食至正。
經濟鹹水魚
對魚的要求，Carmen跟一般家庭主婦沒有分別，都是「平夾靚」，重話媽咪都係去明威鮮魚買魚，所賣的都是常見鹹水魚，而且大部份都賣$2-$3一両，夠晒經濟。（明威鮮魚）
肉質肥美黃花
黃花雖屬魚檔常客，不過今期肉質特別肥美，「揀魚身硬淨，唔會軟腍腍的魚最好。」除了清蒸外，Carmen亦愛用薑葱絲煎香來吃。
鮮甜紅雞
又稱三刀魚，一般街市較罕見，肉質頗厚，一條一家四口食啱啱好，清蒸味道最鮮甜。
