上環普頓臺附近有唔少泰國華僑聚居，佢哋多同移居海外嘅華僑保持密切關係，發展商長實睇中呢點，當晒佢哋係個盤嘅潛在買家，所以聯同中原去泰國做路演。由於當地華僑，好多都係講潮州話同福建話，中原特別派出兩位精通呢兩地方言嘅「普頓臺專員」，讀熟樓盤嘅資料，準備聽日出發赴泰國及印尼推介。
中原重特別設立兩條華僑諮詢熱線，分別以講潮州及福建話嘅專員接聽，早前已經將一萬份物業資料，寄去泰國同印尼嘅華僑商會，中原高級董事何兆棠話，𠵱家淨係港島西區嘅分行，已經收到四十多個海外華僑查詢。
大家都知普頓臺附近多海味舖，唔少供應商都係泰國華僑，長實助理營業經理梁焯鏗就話，呢批客好有實力，笑言淨係啲燕窩嘅價值，已經可以畀首期。
梁焯鏗話，之前已經有兩批共十五人嘅泰國華僑，表示對普頓臺有興趣，中原喺泰印之行後，就會安排佢哋下個月初嚟香港，參觀已經接近竣工嘅示範單位。
世紀21噚日喺大會堂高座八樓舉行今年最後一次季會，重請到自由黨嘅常務委員會委員呂志華做演講嘉賓。
雖然佢係財經界係猛人，又寫過唔少財經專欄，但噚日講嘅反而主要環繞佢以前做觀塘區議會議員，同後尾點解又唔做嘅話題，至於佢至拿手嘅投資心得就只係略為帶過。
不過，佢都認同地產市道明年初會好轉喎，最後當然就係借機會，推銷吓自己幾本著作啦。
熱到爆燈嘅投資移民計劃，首日申請反應麻麻哋，唔少業內人士批評政府宣傳不足，發展商同地產代理就實行主動出擊，向海外僑胞宣傳推廣呢個計劃。利嘉閣地產執行董事廖偉強就話，今年底前集團會到馬來西亞吉隆坡搞路演。
中原一姐（劉瑛琳）就噚晚出發去泰國度假三日，佢話此行除咗休息充電，更重要嘅任務就係推廣移民計劃，帶備唔少樓盤資料同投資移民簡介單張，親自到泰國華僑商會做宣傳，連放假都要工作，一姐真係唔易做。香港人幾時都咁進取，把握每個時機，靠自己好過靠政府。
自由行同CEPA效應下，內地同香港嘅關係日趨緊密，唔單止啱啱成功上太空嘅楊利偉就快來港探訪，首屆北京房地產展覽好快都喺香港舉行。
聽聞主辦單位係北京貿易促進會，展覽期喺下個月21至23號，選址灣仔會展。到時會有十四個內地發展商，超過三十個樓盤推銷。好似話北京市副市長都會出席。參展嘅發展商，名氣較大嘅有城建投資、首創集團、海淀科技園等，20號嘅晚宴重會邀請香港發展商出席㖭。
市況雖然好番啲，但仍然慳得就慳。蘭西最近去沙田第一城採訪，睇見管理通告第一句，簡單直接，重好有人情味，標題係「免收2004年1月份管理費通告」。內容大致係委員會透過多項節省開支嘅方法，成功爭取明年度嘅管理費減百分之八點三，相當於一個月嘅管理費，所以，索性全屋苑免收一個月管理費。
講開管理費，居屋管理費真係平得令人羨慕，好似有個全麻石電梯大堂嘅慈雲山慈愛苑三期，八百五十一方呎單位，管理月費都只係六百零九蚊，大概七毫子呎，認真夠平。
蘭西
電郵地址：