上周四大摩建議減持港股，恒指單日大跌501點，噚日花旗美邦調高香港地產股及銀行股的投資比重，港股大幅回升342點。
港股走勢如此波動，噚日經紀行內散戶議論紛紛，有人話美資鬼打鬼禍及無辜，又有人話神鬼都係佢哋。更有人問得離奇，點解馬匹走勢古怪有疑點，馬會競賽小組會問話，但港股暴升暴跌則冇人理？搞到趙飛雲一頭霧水。不過，期指結算前兩大行先後發表對港股完全不同投資建議，時間上又未免太巧合。
噚日好友大反攻，又回復先前的霸氣，期指一級級挾上，在升破12000關口後，好友一步不退，淡友沽到心慌自動平倉投降，結果愈挾愈高，現貨月期指收12136，大升391點，由低水轉為高水45點。恒指則收12091，升342點。
好友前日以中資藍籌力撐，噚日不但精銳盡出，更是全軍出擊，33隻恒指成份股中有32隻上升，1隻平收。滙豐（005）及中移動（941）打雙中鋒，前者升2.7%，收113元，後者升5.4%，收22.50元，兩股合共為恒指貢獻180點升幅。至於斯人獨憔悴則是上實（363），平收14.75元，唔通真係受到出局傳聞困擾？
趙飛雲噚日幾乎中招，一度考慮過在10日線12000水平買恒指Put輪，但見恒指破關後不肯回頭，並重返頸線12021之上橫行，決定忍手觀望，因此逃過一劫。
恒指已補回上周四大部份下跌裂口，形勢上是準備挑戰早前高位12297。恒指保歷加通道頂現時在12328，估計12300水平附近有初步阻力，究竟是破頂而上，還是以小雙頂回落，期指結算前料有分曉。恒指若上試12300不破，可伺機買Put輪。
趙飛雲