古巨基日前邀得應屆港姐冠軍曹敏莉擔任新歌MV女主角，基仔對曹敏莉甚有好感，一見即讚不絕口。而二人在拍攝拖手鏡頭時，基仔害羞到面紅且狂冒手汗，曹敏莉要用四包紙巾來抹手。
古巨基將於下月推出新碟，他日前拍攝新歌《必殺技》MV，特地請來應屆港姐冠軍曹敏莉任女主角，基仔得靚女港姐處女下海拍MV，似乎對她甚有好感，但基仔竟以手汗回贈對方，結果曹敏莉要以四包紙巾抹手。
基仔坦言首次與曹敏莉合作，對她甚有好感，他拍攝當日第一次見曹敏莉真人，即忍不住向工作人員大讚對方說：「佢真人靚過上鏡，表現又好淡定，我覺得佢喺娛樂圈一定好有前途，大有作為，佢代表香港出外比賽一定有好成績。」
基仔平時面對與他合作的靚女都表現含蓄，今次甫見曹敏莉就驚為天人，更被人取笑他「痰上頸」，導演要求二人拖手扮恩愛時，基仔竟忽然面紅又狂冒手汗，而在該鏡頭拍完後，曹敏莉要用四包紙巾來抹汗，十分搞笑。
曹敏莉首次拍MV，她表示與基仔合作十分開心，但卻被對方的手汗嚇怕，曹敏莉說：「導演要我哋拖手，估唔到佢有咁多手汗，我忽然成手都係水，嚇親我呀。」
被問到是否對曹敏莉一見鍾情，基仔說：「唔係，我係因為同佢拖手，自己又大手汗，先覺得唔好意思咋，唔信你問方力申，我同佢做舞台劇時，佢都領教過。我都唔係第一次同港姐合作，之前楊思琦都同我拍過MV啦，放心啦，我好夠定力㗎。」
