大市震完倉，又再上過，恒指重上萬二大關樓上，昨日收市報12091，大升342點，成交升番上160億元。期指重有兩日結算，收報12136，大升391點，仍高水45點，好友今次要食到盡。
銀行水浸，唔止到眼眉，幾乎沒頂，噚日大額定期存款利息有幾多？答案係1個月期只得0.01厘，100萬存款只得利息100大元，食之肯定無味，棄之絕不可惜。銀行此舉無疑趕錢入市，熱錢來勢已洶洶，加埋本土資金亦被趕入市場，港股唔急升才怪！中國人保財險（2328）在港招股上市，集資額唔細，但對銀行頭寸完全冇影響。
噚日個市，可以話係全面發展，藍籌大升，國企亦然（指數升156點，升幅4.3%），至於工業股，個別亦明顯轉強，上周末推介的東強電子（615），高收1.07元，升11.4%；信利國際（732）亦升9.3%，而短期內傳有大動作醞釀的宜進利（304），亦連續第2日上升，收報0.96元，再升4仙。
宜進利係香港最大的鐘表生產商之一，廠房設備先進，猶勝日本同瑞士呢兩個大阿哥，早輪宜進利在日本做騷，幾個「大芬」都表示有興趣入股宜進利，聽聞短期內會進一步洽商。
日本之行成功，宜進利下個月又兼程去歐洲同新加坡做路演，聽芬佬講，呢兩地嘅「大芬」初步了解過公司後，亦表示有濃厚興趣。
利好消息重有好多，宜進利本來已安排大舉進軍內地市場，CEPA推出，更令佢如魚得水，集團已在荃灣安裝兩條鐘表裝嵌生產線，每天裝配4000隻手表，1個月12萬隻，而計劃將5萬隻高檔名牌表內銷，每隻售價800至1000元，利潤最少200元，1個月就賺成千萬元。
為拓展內銷，集團正同在內地有龐大銷售網的公司洽商合作，其中一家係日本3大的表廠，由於合作對雙方都有利，相信好快可落實。
04年度（3月年結），估計宜進利盈利可達9000萬元，升55%，每股盈利16.3仙，預測PE不足6倍。05年度，中國市場利潤入注，盈利可持續急升。
近3個月，宜進利股價在0.80元至0.97元間上落，噚日成交已大增，今次一衝破阻力，第一個目標1.15元，中線可見1.54元。
郭兆誠