【本報訊】財政司司長唐英年與立法會議員兩個多月的「蜜月期」告終。勞工界及民主派議員昨日猛烈批評他的預算藍圖，不但大削教育資源、未有為打工仔創造就業機會，在解決財赤問題上只識「等運到」，又將十億振興經濟基金用來「大花筒」，唐英年也毫不客氣以冷嘲熱諷「回敬」議員，指毋須議員「教我點投資教育」，又批評議員只懂放「馬後炮、講風涼話」。 記者：莫劍弦
遭唐英年諷刺的職工盟議員李卓人批評他態度「直情係輕佻夾風涼」，李指摘唐英年根本就是「應使佢唔使、應慳佢就唔慳」，另一位被他嘲諷的張文光則形容唐英年「一闊臉就變」更說：「佢今日連笑容都收埋，開始反擊民意！」
唐英年昨日出席立法會財經事務委員會特別會議，向議員簡介上周公布的滅赤藍圖，不過議員對唐英年大削開支顯得十分不滿，代表教育界的張文光指唐英年五年削六十億開支，不但令教育界面對「血肉戰場」，削減幅度較前司長梁錦松更盡更深，他說「教師可以自然流失，但學生同班級唔會流失」！
唐英年即時反駁張文光，「我冇聽過有人話唔應該控制公共開支」，又諷刺張：「張文光，唔使你教我點投資教育，我亦唔會教你點投資教育！」
前綫召集人劉慧卿則批評，唐英年根本無法提出有效滅赤方案，「咁困難情況你做過乜？唔好等運到喇！而且個運亦未必會到！」唐英年即時反駁：「我知我唔係等運到，我唔知係咪你認為我等運到呢？」他強調藍圖「唔可以將細節一五一十寫晒出嚟」，認為只會太草率
可是李卓人立即以十億振興經濟基金為例，指財赤嚴重，仍然拿錢放煙花、用一億搞維港巨星匯，令到「天有煙花景、路有凍死骨」，直斥唐「財赤咁嚴重，重專係大花筒」。
唐英年聽到李卓人指摘，顯得有些動氣，他先駁李卓人「馬後炮、講吓風涼話係好容易」，隨即反指議員要對十億負責：「十億重振經濟基金，係你哋史無前例簽咗張十億空頭支票畀我哋」，對於議員揚言要查數，唐竟說：「到時我哋有條數，大家可以好『風涼』咁睇下呢筆錢點使，呢筆又點使。」李卓人即時炮轟唐英年：「我有衝動即刻起身同市民道歉」，更表明日後再要議員先撥款，「以後冇呢支歌唱」！
何俊仁則批評唐英年至今拒絕見基層市民，唐英年只回應說他見議員中有基層代表，始終不承諾見低下層團體，而代表勞工界的陳婉嫻及李鳳英，不約而同批評唐英年未有利用更緊密經貿關係，提供稅務優惠，吸引工業回流，「冇幫打工仔」但唐英年推說要再聽意見，他又承認市場上的確有些工沒有底薪，但他形容有些「年薪百萬金融工作，一樣係冇人工（底薪）」，所以不認為有問題。
