大市噚日大升逾三百點，但小初剛剛推介的亞洲鋁業（930），竟然倒跌3.27％收場，實在令人失望。
小初就此請教經紀黃，佢就將之歸咎於噚日下晝一宗非自動對盤成交，呢批股份共1246萬股，每股造價1.47元。經紀黃重話，上次有大戶亦係喺呢個價錢批咗1億股出嚟，之後亞鋁股價就回落好一段時間。
今次大戶又批一手出嚟，Size雖然細好多，但因為大戶減磅，投資者心理上點都有多少影響。
亞鋁收報1.48元，成交股數有46.44球，金額接近7000萬元。公司今日公布業績，希望表現靚仔，令股價做番好啲。
另外，經紀陳講咗好耐嘅明倫集團（346），喺早前批股時接咗平貨嘅人獲利清倉後，終於趁市旺發難，噚日彈升11%，收0.26元，雖然收市時幾乎掃清板咁滯，但成交股數只得14.19球，金額仍然好細，只得341萬銀。
經紀陳話，玩咗咁耐先至收得齊，睇嚟幕後炒家實力一般，上咗車嘅不妨先計數賺錢。
慕容小初