香港有三大才子，就係靠枝筆辦報、寫文章寫到發大達嘅《信報》老闆林行止；地位超然，文壇享譽甚隆嘅《蘋果日報》社長董橋，以及冷眼看世界，雖仍未發達，只係靠枝筆養妻活兒嘅專欄作家陶傑。林行止擅寫政經文章，董橋係小品專家，陶傑《黃金冒險號》文筆辛辣，罵人於無形之間。三大名家之中，《蘋果日報》得其二，肥佬黎都算巴閉。
上星期日，陶傑寫宋美齡，題為《恩空怨幻晚晴風景殘山剩水腕底煙霞》，可說震驚全港，左丁山朝早九點被電話吵醒起床，出門口攞報紙八份，坐低飲杯伯爵茶，打開《蘋果》，揭到A4頁，睇見陶傑篇《星期天休息》，如此標題當堂精神為之一振，捧讀再三，睡意全消。自己再讀書二十年，都寫唔出如此文章，冇法子唔服。繼而不斷收到電話，問左丁山睇咗陶傑寫宋美齡未？
一位老友讚嘆話：「陶傑四十零歲，寫一位一百零六歲嘅一代女性，如此細膩動人，真係才情橫溢，寫宋美齡算係壓卷之作，肥佬黎好應該責成台灣《蘋果日報》轉載，益吓台灣讀者，畢竟香港人好多唔識宋美齡，陶傑鴻文在台灣應引起更大迴響。」
此言甚是，以肥佬黎之眼光，應該早已責成台灣《蘋果》矣。該文唯一可以略加修正嘅係，馬克奇維里（NiccoloMachiavelli）唔算係羅馬政治思想家，佢嘅在生年代（1469-1527）已係中國明朝時期，佢雖則係意大利佛羅倫斯人，但距離甚遠，唔算得係羅馬思想家啩？