有個富豪雖然鍾意追女仔，但佢唔係好捨得使錢，所以高質素嘅女仔就冇佢份，呢啲叫一分錢，一分貨。本來個人孤寒都唔關人哋事，但馮仁昭又諗唔到佢個人都幾貪心，話說有次佢同女友搭飛機去外地玩，咁啱撞到幾對名人夫婦一齊上機，因為大家都識，咁就梗係有打招呼啦！
點知到落機時，其中一對名人夫婦發現自己部手提攝錄機唔見咗，孤寒富豪手中又忽然多咗部同款嘅手提攝錄機喎！當時，名人夫婦雖然明知有人順手牽羊，但又唔想做得太絕，所以只係走埋去問佢係咪攞錯嘢，孤寒富豪咪尷尷尬尬咁畀番部機人囉！嗰日同機重有幾個名人都睇到咁嘅情況，大家都覺得名人夫婦都算厚道，問佢攞番部機就算，冇搞大件事，如果唔係，孤寒富豪就乜面都冇晒。
MaggieQ噚日去米埔出席環保行活動，對於日前俾傳媒影到佢喺上海同Ferragamo設計師攬晒腰跳舞，佢話：「未睇過段報道，所以冇回應。」馮仁昭就覺得MaggieQ啲鬼妹仔性格咁開放，同邊個跳舞都得啦！佢重邊度記得嗰晚嘅舞伴係邊個喎！
珈潁噚日喺青衣城，宣傳由亞視播映嘅韓劇《AllIn真愛賭注》。珈潁喺台上俾司儀踢爆偏愛大肚腩男士，問番佢點解「口味」咁獨特？珈潁就話：「有少少肚腩嘅男人有安全感啲，男朋友太弗會有好多人望，我個人好霸道，唔鍾意咁，最好係超過三十歲，再成熟啲重好。」
噚日有報道指無綫早前要求各員工準時上班同注意紀律，令到全公司上下都驚係裁員先兆，噚日無綫助理總經理陳志雲就即刻出嚟澄清，佢話無綫冇白色恐怖，亦都暫時冇裁員嘅構思，不過佢就承認要整頓紀律。而另一高層何定鈞就承認搬咗入將軍澳之後，員工遲到嘅情況嚴重咗。
薛家燕（好姨）早前去尖沙嘴一間皮草店做開幕嘉賓，雖然大會請咗三個上海小姐到場，但係都唔夠好姨着住件皮草披肩襯紅寶石飾物咁搶眼。好姨話：「我同間皮草公司傾緊做代言人嘅嘢，佢哋話會設計兩套皮草畀我，等我喺下個月嘅台慶威吓！」問佢做皮草代言人怕唔怕俾人話唔人道？佢話：「我都有諗過，不過老闆娘話啲皮草唔係嚟自野生動物，全部都係外國人工養殖，所以冇嘢啩！」
陳寶珠噚日去商台接受訪問，寶珠姐近日忙做演唱會綵排，由於七公主之一嘅蕭芳芳嘅耳仔有事，所以唔可以嚟支持佢，不過寶珠姐話芳芳會拍一段短片嚟支持自己。
寶珠姐重話𠵱家啲飛賣得幾好，所以好想加場，不過呢啲嘢就要問番主辦嘅張耀榮，張耀榮聽到寶珠姐咁講就應該識做啦！
