一眾香港爸爸，工作賺錢忙，公餘賭錢更忙。但閣下有冇望清楚仔仔囡囡，不知不覺已經十多歲，再唔係買買玩具打打遊戲機就可以滿足。佢哋絕對需要健康嘅家庭樂！是時候抽抽空，和他們一起，認識一下大自然，有益身心！海下，一個不錯的天然教室。 記者：鍾可強
攝影：黃子偉
模特兒：Connie、Man（Richstrategy）
海下灣位於西貢西郊野公園北端，係一個受遮蔽嘅海灣，所以環境特別優美，係香港有數著名生態環境之一。呢度有珊瑚群落、海洋生物、紅樹林、幼沙灘，最適宜進行不講求大運動量嘅郊外活動，一家大細拖男帶女亦可以玩個不亦樂乎。時值秋天，絕對係周末周日嘅理想造訪旅遊點。
從海下村向前行十多分鐘，便進入海下灣海岸公園範圍。呢個海岸公園對十多歲年輕人最具吸引力，因為可以透過實地勘察，了解地理常識，更可走落布滿珊瑚群的海中作徒手潛泳。雖然天氣已轉涼，但穿上潛水禦寒衣進行潛泳，小朋友一定雀躍萬分。
珊瑚群落位於海下灣碼頭右端，該範圍水質潔淨，海底下有不少珊瑚品種，全港八十八種已知嘅石珊瑚，其中五十九種都可以喺呢度搵到，你話幾咁精采。即使唔落水，趁水退時間在碼頭邊看珊瑚，一樣可以看到茂盛嘅珊瑚群落。呢個碼頭每到假期就人頭湧湧，屬於海下灣著名景點。有一樣要提醒遊人，喺碼頭範圍有不少艇家兜搭閣下出海看珊瑚，雖然喺碼頭一定睇得到喉唔到肺，出海梗係靚好多，但我話你知，呢啲艇仔屬私人經營，冇保險㗎，有乜嘢事就閣下自負！
睇完珊瑚可以行去大灘，呢個海下灣本來都幾靚，但你會發覺冇乜人游水，原因佢唔屬於正規海灘，冇救生設施，都係嗰句，後果自負。其實，曬吓太陽吹吓海風都幾舒服。呢度有嚿東風響石，爬上去用手拍吓石身，會有咚咚聲嘅回音㗎。皆因佢屬空心石，所以有回音效應。個個嚟到都一定爬上去，拍吓聽吓，小朋友一定玩得好開心。
從沙灘返回海下村，會路經一個香港歷史遺迹，就係石灰窰。石灰窰係海下灣著名古迹。呢度有四個超過百年歷史嘅石灰窰。其中兩個較為完整嘅，就坐落喺海下灣東岸。喺一八○○年至一九三九年期間，村民從蠔殼或珊瑚骨骼提煉石灰作建築及農業用途，亦係香港其中一個最早期嘅工業。
再沿海下村左面走去，就會走到海下灣嘅河口一帶，呢邊就係著名紅樹林群落嘅生長區。呢組紅樹林約佔0.53公頃，有四種紅樹品種，包括秋茄、桐花樹、海漆同埋木欖。紅樹林地區係幼魚、潮間及潮下帶無脊椎動物嘅哺育場。紅樹林生長喺沙灘邊陲，翠綠植物跟幼白海沙相襯，構成美麗風景，喺呢啲地方影相就夠晒沙龍感覺。而由海下村行過紅樹林期間，亦有不少石堆縱橫交錯，不少拍友都視為理想取景地方。
可以咁講，海下灣有齊形形色色自然風味，卻不需消耗太大體能去遊覽，實為一個城市人的理想郊遊地點。現時漁農自然護理署每逢周六、日以及公眾假期，都有舉辦「海下灣海岸公園生態導遊」的活動，有專人帶領參加者暢遊各景點，沿途講解海洋生態知識及名勝古迹歷史。但每次只有二十五個名額，記得早點去啦！要是未能參與，跟住做旁聽生都唔錯，自行遊覽亦可，但駕車則須有禁區紙。
「生態導遊」報名處：海下灣海岸公園護理員站崗，額滿即止。
出團時間：逢周六、日早上十時三十分及下午二時十五分
