中國鋁業（2600）受氧化鋁加價消息刺激，搞到噚日股價好似食咗藥咁，勁升13.24%，收3.85元，再創新高。
中國鋁業勁升，亦同時令其他同「鋁」字扯上關係的股份勁升，好似海域集團（1220）大升7.6%，收2.825元，而亞洲鋁業（930）亦升6.25%，收1.53元。
經紀陳話，雖然海域呢排炒味較濃，但佢就比較鍾意亞洲鋁業，皆因公司將於本周三公布全年業績，據講表現會好出色，按傳統智慧，股價應該例牌彈一彈。
亞鋁幾個月前公布，中期純利為1.78億元，上升84%，斷估下半年業績唔會有太大走樣．加上早排有芬佬坐咗大批貨，芬佬出錢之餘，更有大行出報告護航，所以經紀陳覺得隻股，有機會短炒一轉。
另外，小初上周末提過航天科技（031）與新世界基建（301）合作搞衞星及有線電視，噚日雙方公布成立合營公司，重講到未來營業額將以十億元計。未來係點未來先知，但航科股價噚日就已經飆升10.53%，收0.63元。
慕容小初