自從舊國寶伏明霞行情轉淡之後，新任國寶神舟五號太空人楊利偉過幾日就嚟香港，噚日上京見領導嘅一班立法會獨立議員唔知係咪等唔切，噚日下午先去北京中華世紀壇先睹為快，但係唔好以為，燒到一嚿黑鐵咁嘅返回艙一定好吸引，對以體育癡自居嘅霍震霆嚟講，返回艙呢嚿鐵完全比唔上一支奧運會旗。
小霍噚日一到中華世紀壇，第一件事係跑去搵一支二○○八北京奧運會旗，都冇乜人知呢支旗原來都上過太空，而且支旗唔係擺喺好當眼處，結果佢四處狂奔，問埋工作人員先搵到。後來佢發現支旗上面，有塊白布簽埋楊利偉個名，個樣重開心到見牙唔見眼㖭。
不過佢最開心都係兩位公子──啟剛同啟仁，噚晚特登上京陪佢食飯，而訪京團團長李家祥都唔輸蝕，帶埋老婆同助手上京，助手幫佢安排時間，老婆就做埋業餘攝影師，走嚟走去搵靚位影相，二十四孝到不得了。
傳真︰2623-9278
電郵︰