萬人迷碧咸（DavidBeckham）個老婆Victoria，不嬲俾英國嘅傳媒以Posh（高貴）嚟稱呼佢，證明佢嘅形象都幾煞食。不過最近Victoria俾人摷番佢未做歌手前嘅模特兒相，我羅拉發現當年嘅Victoria一身娘味，當時邊有人估到佢係英國今時今日嘅頭號名人？
好多人都知Victoria未入行已經係有錢女一名，但係喺十年前當佢重係十九歲嗰陣，只不過係一個寂寂無聞嘅模特兒，有雜誌重特登搵番佢當年拍嘅模特兒履歷。當年嘅Victoria，無論衣着品味、甫士到髮型，都係娘到爆燈，大家可以比較吓，同今日嘅佢真係差天共地！
另外，Victoria喺履歷裏面自稱有34-25-35嘅身材，又報話有五呎七吋高，但係明顯就報大數啦。不過最令人驚訝嘅係，Victoria當年填履歷時寫自己個名做VictoriaAadamsWood，原來佢跟咗同佢訂咗婚嘅男友MarkWood姓！另一方面，呢排有人傳Victoria，同佢個hiphop音樂監製DamonDash行得好埋，不過前兩日Damon又踩到Victoria嘅流行大碟一文不值，真係唔知佢兩個搞邊科！