許志安與鄭秀文（Sammi）前晚在電視城碰頭，安仔不時望着Sammi，但Sammi則一直別過臉，詞鋒銳利的主持鄭裕玲即將二人緋聞擺上枱，揶揄Sammi與安仔，激得安仔忍不住指她離題。
許志安與鄭秀文自傳出復合後，前晚首次同場出現，於將軍澳電視廣播城為梅艷芳舉行的《梅艷芳真心相聚》節目錄影，阿梅請來一班徒弟好友出席，包括許志安、陳奕迅及Sammi等。Sammi因工作關係姍姍來遲，但自進場開始，安仔便不時望着她，不過Sammi卻顯得十分避忌，全程極力望向安仔的反方向。
當主持鄭裕玲（嘟嘟）問到Sammi平時與阿梅聊甚麼時，她只說減肥及扮靚，但阿梅踢爆她說：「唔係呀，都有講感情，你問我好多男仔唔知點選擇。」嘟嘟即笑說：「乜唔係選咗咩？」而嘟嘟見Sammi全晚不望安仔，又問她：「你今晚好奇怪，點解唔望我左邊？」弄得Sammi一臉尷尬，只扮作甚麼都聽不見。
嘟嘟得勢不饒人，更轉向安仔說：「梅姐有冇問你點選擇呀？你選擇定未㗎？」安仔聞言似乎不滿被擺上枱，嚴肅地說：「今日個主題好似離開咗。」之後嘟嘟才識趣地轉換話題。
錄影完畢後，嘟嘟又特地走近安仔問：「啲人問我，我哋有冇嘢喎？」安仔即說：「冇嘢，下次俾我捉到你啲嘢就報復。」
問安仔會不會介意被人拿來做題，他說：「我唔介意，但個主題係偏離咗，個鏡頭影咗我幾次大頭，有啲唔舒服，個節目唔關我哋事。」提到Sammi似乎迴避他，安仔就說：「可能佢唔想俾人影相，其實個節目唔應該咁多男女私情。」
對於將她與安仔作為話題，Sammi助手在陪伴Sammi離場時說：「今日唔好將唔應關注嘅嘢放埋一齊。」此外，Sammi日前與台灣藝人藍正龍拍攝新國語歌《美麗的誤會》MV，內容講述Sammi對一段十多年的戀情面臨抉擇，內容與阿梅所言不謀而合。
採訪：王連連
攝影：仇志德
