中原地產白沙道分行營業員李日開認真博命，佢禮拜日擺酒結婚，咁啱嗰日有客話要再次睇樓，佢就計啱時間，中途離開一陣，着住禮服趕去帶客睇樓，終於開到單，之後重趕得切返去酒樓，若無其事咁完成埋個婚宴。
據營業董事蔡佩芳講，好似李日開咁，結婚大日子都開工開單嘅例子甚少，而李日開做成嘅係跑馬地蔚豪苑A座頂樓連天台1室，面積一千九百九十三方呎，成交價一千五百八十萬，呎價七千九百二十八蚊，佣金有三十幾萬，咁個同事拆到嘅都應該唔少。聽講呢單成交重係蔚豪苑喺沙士之後嘅第一宗買賣㖭。
一名喺灣仔住嘅行山客，行完山後，順路去小西灣藍灣半島睇樓，兩個鐘頭唔使，就落實用四百三十八萬，買入九座高層C一手單位。
美聯助理區域經理李志偉講，個客年幾前都有嚟睇過樓，可以話係公司舊客。
李志偉估計，個客由於就快退休，又鍾意行山，藍灣半島近行山徑兼有全海景，空氣好，最主要加上市況好咗，所以至可打動佢入市。
寫字樓售價最近升番唔少，買家入市態度積極咗好多，最近重出現爭貨情形，有客願意畀多五個巴仙到一成㖭，結果造就啲短炒家獲利。
另外，市場又有高層平過低層嘅情況，皆因樓價升咗，早前成交嘅高層咪變成平咗囉。不過，由於租務市道重未配合，即租金冇明顯上升，所以買賣價升完一輪之後，都要再等吓先至有機會繼續再上。
買家有意入市，都想知道樓盤有乜單位可以揀、價錢同付款辦法，但唔係人人都有時間去售樓處攞資料研究，咁點做呢？原來上網就搞掂嘞。
蘭西最近發現長實網頁，有將樓盤價單等資料上網，買家可以慢慢計數，覺得合意至去買，認真方便。但要留意唔係全部樓盤都有價單刊出㗎。另外，樓盤價錢時時變，唔知網頁有冇跟得咁貼，唔係到時去到至知個價郁咗，就大失預算嘞。
蘭西
電郵地址：