恒指回升13點，幅度有限，有上升股隻（不計認股證）係下跌股隻兩倍，屬好現象，相信近期跌勢告一段落，個市又有得玩。
昨日最出色股份除咗有H股之外，就輪到銀行類，唔包括滙豐（005）。恒生（011）升1.6%，中銀（2388）升3.5%，東亞（023）升，滙豐則跌0.5%。
恒生個勢上緊，估計唔會只玩一日咁短癮，搵啲Call輪短炒，想波幅大，揀9162，明年4月到期，輪價40.5仙，溢價7.3%，槓桿率24倍。貪數據靚，則揀9911，亦係明年4月到期，輪價1.01元，零溢價，槓桿率9.6倍。
中銀近期大升之後，Call輪溢價普遍仍然幾貴吓，唔貴嗰啲，則槓桿率唔夠爆炸或者交投疏落，長期Call輪，則溢價十幾二十巴仙，值博率唔高。東亞有一段時期已冇Call輪發行，想炒都冇對象。
3大銀行股都升，滙豐冇郁，有機會其他銀行股郁完之後，輪到佢。滙豐Call輪，好多隻數據都夠晒吸引，例如9845，12月到期，輪價1.44元，負溢價0.6%，槓桿率有7.6倍。其他如9908同埋9923，都諗得過，只不過交投冇9845咁旺。
章盛