張學友近年幾乎絕迹各大頒獎禮，但自月前舞影行動令樂壇蒙污，昨日學友抽空出席港台「第二十六屆十大中文金曲」記者會，上台發表個人意見鼓勵四台聯頒，他又不諱言若無一個具代表性的頒獎禮讓他可再次站到台上領獎，便不會再攞獎。
張學友、李克勤、古巨基、容祖兒及梁詠琪等數十歌手，昨日齊聚橫頭磡樂善堂余近卿中學禮堂，出席港台的「第二十六屆十大中文金曲」揭幕記者會。
早前廉政公署採取「舞影行動」，有無綫高層與唱片公司人員因涉樂壇貪污案而被捕，即時引起極大迴響，令大眾質疑各大頒獎禮的公信力，港台有見及此，再次大力推動四台聯頒一事，希望合四台之力舉辦一個統一的頒獎禮，但有傳商台和無綫對此反應冷淡，合作意欲極低。
「統一係樂壇之福」
為此近年已甚少出席頒獎禮記者會的張學友，昨日特地抽空到場，並上台說出他的心底話。
學友說：「我𠵱家所講並唔代表所有歌手嘅立場，只係代表我自己。我諗好多人都想知我點解會出席呢個記者會，因為唐哥（港台高層李再唐）打電話畀我，佢話𠵱家樂壇有好多是非，好似『舞影行動』咁，唔理佢有影冇影都好，但日後樂壇嘅頒獎禮都會因此蒙上污點。
「今日我好開心，港台肯踏出第一步，想有一個統一嘅頒獎禮，我自己覺得𠵱家樂壇嘅環境，咁做係有需要同有好處，亦都係我嘅夢想。我希望嚟緊去晒所有頒獎禮招待會，如果我去晒，代表佢哋願意統一，我自己覺得呢個係樂壇之福。」
「等我可以再企上台」
此時主持人即表示如在座各歌手同意學友所言的便舉手，眾歌手都紛紛舉手表支持，其中蕭正楠審慎地望向在旁的歌手，看到有人舉手才放心將手舉高。
事後問到學友是否很希望四台聯頒？學友坦言道：「講咗咁耐真係要有個台支持下，我真係唔知道得唔得，但如果有一個我再想出席嘅頒獎禮，我希望係一個具有代表性嘅。」
問學友言下之意是否今年會因四台分開舉辦頒獎禮而不攞獎？學友說：「都唔係第一年，但我真係希望有一個統一嘅頒獎禮，等我可以再企上台。」
記者問大會總監李再唐是否親自致電學友邀他出席時，他說：「其實我哋不時都有通電話，而學友都有同我提及想有一個統一嘅頒獎禮，所以我哋就邀請佢出席。」再問他各台反應是否很冷淡？李再唐說：「都唔可以話冷淡嘅，始終各台都有唔同嘅需要，𠵱家我哋每個星期都會開一次會。」
停頒原創、改編歌獎
此外，港台製作統籌周國豐表示今年「十大中文金曲」會減少三個獎，包括「最佳原創歌曲」、「最佳改編歌曲」及「最受歡迎卡拉OK歌曲」。
周國豐說：「因為當年原創風氣唔係咁高，所以我哋先增設呢啲獎，但近年創作歌同改編歌嘅比率差唔多，所以就取消。而卡拉OK係因為沙士之後有唔少卡拉OK倒閉，其他又太壟斷，免得有唔公平，所以同樣取消。」
採訪、攝影：胡比、李珮洳
攝影：林德雄、何國豪
