地產L早十零年返東莞發展地產，一炮而紅，後來地產低潮，佢憑早飲頭淡湯之年，沉着應變，卒之安然過渡，呢兩三年又試發到飛起。原來地產L讀書時代，好喜歡夾band，彈結他相當到家，幾個月前周圍搵番啲老同學一齊重彈舊調，夾得好過癮，唯一欠缺嘅，只係一個鼓手。地產L對左丁山講：「學打鼓唔難嘅，最緊要有節奏感，不如你學打鼓，加入我哋呢隊老餅樂隊！」
講笑咩，自問毫無音樂細胞，點敢臨老學吹打呀！平時只鍾意聽，唔識彈，呢次結他聖手Santana嚟（十一月一日），早已買定飛，到時肯定會碰到地產L成班人，因為逢係彈結他嘅，冇一個唔崇拜或者佩服Santana嘅。《維港巨星匯》雖然搞到一鑊粥，但據一啲去過現場聽CraigDavid、Prince、JoseCarreras嘅朋友講，表演極為出色，聽出耳油，更加多次「安歌」，現場氣氛好熱烈，不失為一場好好嘅表演。
據辦過多次老牌歌星演唱會嘅樂仕講：外國著名歌星，無論台下態度點樣沙塵，懶理其他，但一上到台就會為名譽而戰，彈與唱都勁到飛起，包保唔會令台下觀眾失望。如此說來，我哋去聽Santana、滾石，一定唔會聽到火滾，好可能在現場左搖右擺，rock到成身滾晒，聽嚟應該多帶兩樽水入場就妥當啲。各位老友，十一月一日，大家聽結他，滾到碌地先。